گال ٹیسٹ پر سری لنکا کی گرفت مضبوط، نیوزی لینڈ کا سری لنکا کو فتح کیلئے 268 رنز کا ہدف،

گال ۔ 17 اگست (اے پی پی) آئی سی سی ورلڈ ٹیسٹ چیمپئن شپ کے سلسلے میں سری لنکا اور نیوزی لینڈ کی کرکٹ ٹیموں کے درمیان پہلا ٹیسٹ میچ فیصلہ کن مرحلے میں داخل ہو گیا ہے اور میزبان ٹیم کی میچ پر گرفت مضبوط ہے، نیوزی لینڈ کی ٹیم دوسری اننگز میں 285 رنز بنا کر آﺅٹ ہو گئی اور اس نے آئی لینڈرز کو فتح کیلئے مجموعی طور پر 268 رنز کا ہدف دیا، بی جے واٹلنگ 77 رنز بنا کر نمایاں رہے، سومر ویلی 40 رنز بنا کر ناٹ آﺅٹ رہے، ایمبل ڈینیا نے 4 کھلاڑیوں کو آﺅٹ کیا۔ جواب میں سری لنکن ٹیم نے چوتھے روز کھیل ختم ہونے تک اپنی دوسری اننگز میں بغیر کسی وکٹ کے نقصان پر 133 رنز بنا لئے تھے، کپتان دیمتھ کرونارتنے 71 اور لاہیرو تھریمانے 57 رنز کے ساتھ وکٹ پر موجود ہیں، میزبان ٹیم کو فتح کیلئے مزید 135 رنز اور کیویز کو 10 وکٹوں کی ضرورت ہے۔

Reference: http://urdu.app.com.pk

پاکستان میں 10 برس بعد ٹیسٹ کرکٹ کی واپسی کا امکان

کولمبو ۔ 17 اگست (اے پی پی) پاکستان میں 10 برس بعد ٹیسٹ کرکٹ کی واپسی کے امکانات پیدا ہو گئے ہیں۔ سری لنکا نے سیکیورٹی وفد کی طرف سے مثبت رپورٹ ملنے کے بعد ٹیم کو دورہ پاکستان بھیجنے پر غور شروع کر دیا ہے اور جلد ہی اس بات کا حتمی اعلان متوقع ہے۔ اگر ساری چیزین پلان کے مطابق ہوئیں تو پاکستان 10 برس بعد اپنی سرزمین پر کسی ٹیم کے خلاف ٹیسٹ میچ کی میزبانی کرے گا۔ مارچ 2009ءمیں سری لنکن ٹیم پر حملے کے بعد پاکستان میں انٹرنیشنل کرکٹ ختم ہو گئی ہے اور گرین شرٹس کو ہوم سیریز بھی متبادل مقام پر کھیلنا پڑ رہی ہیں۔ پاکستان کرکٹ بورڈ (پی سی بی) ملک میں انٹرنیشنل کرکٹ کی بحالی کیلئے سرتوڑ کوشش کر رہا ہے اور اسی سلسلے میں پی سی بی نے سری لنکن ٹیم کو دورہ پاکستان کی دعوت دی ہے جس پر سری لنکا نے اپنا سیکیورٹی وفد پاکستان بھیجا تھا۔ سری لنکا سیکیورٹی وفد نے لاہور اور کراچی کا دورہ کیا اور انتظامات کا جائزہ لینے کے بعد اپنے بورڈ کو رپورٹ پیش کر دی ہے۔

Reference: http://urdu.app.com.pk

لارڈز ٹیسٹ، آسٹریلوی ٹیم پہلی اننگز میں 250 رنز پر آﺅٹ، سمتھ 92 رنز بنا کر نمایاں

لارڈز ۔ 17 اگست (اے پی پی) آئی سی سی ورلڈ ٹیسٹ چیمپئن شپ کے سلسلے میں انگلینڈ اور آسٹریلیا کی ٹیموں کے درمیان جاری دوسرے ایشز ٹیسٹ میچ میں آسٹریلوی ٹیم اپنی پہلی اننگز میں 250 رنز بنا کر آﺅٹ ہو گئی، سٹیون سمتھ نے ایک مرتبہ مشکل وقت میں انتہائی شاندار اور ذمہ دارانہ بیٹنگ کا مظاہرہ کرتے ہوئے 92 رنز کی اننگز کھیل کر ٹیم کو مکمل تباہی سے بچایا، 6 کھلاڑی دوہرا ہندسہ عبور کرنے میں ناکام رہے، براڈ نے 4 اور ووکس نے 3 وکٹیں لیں۔ انگلش ٹیم نے چوتھے روز کھیل ختم ہونے تک اپنی دوسری اننگز میں 4 وکٹوں کے نقصان پر 96 رنز بنا کر مجموعی طور پر 104 رنز کی برتری حاصل کر لی تھی، بین سٹوکس 8 اور جوز بٹلر 4 رنز کے ساتھ وکٹ پر موجود ہیں، کمنز اور سڈل نے 2، 2 کھلاڑیوں کو آﺅٹ کیا۔

Reference: http://urdu.app.com.pk

ٹوئن سٹی بیڈمنٹن چیمپئن شپ (پیر سے) سے شروع ہوگی

اسلام آباد ۔ 17 اگست (اے پی پی) مطاہر بیڈمنٹن اکیڈمی کے زیراہتمام ٹوئن سٹی بیڈمنٹن چیمپئن شپ پیر سے شہباز سپورٹس کمپلیکس راولپنڈی میں شروع ہوگی۔ مطاہر بیڈمنٹن اکیڈمی کے سربراہ مطاہر سہیل نے بتایا کہ چیمپئن شپ کی تیاریاں زور و شور پر ہیں۔ ایونٹ میں اسلام آباد اور راولپنڈی کے مرد، خواتین کھلاڑی حصہ لے سکتے ہیں اور چیمپئن شپ میں مخلتف کیٹگریز کے مقابلے منعقد ہونگے جن میں مینز ڈبلز، لیڈیز سنگلز، بوائز انڈر-16 اور ویٹرن ڈبلز کے مقابلے شامل ہیں۔

Reference: http://urdu.app.com.pk

پاکستان نیشنل ریٹڈ شطرنج چیمپئن شپ (کل) لاہور میں کھیلی جائے گی

اسلام آباد ۔ 17 اگست (اے پی پی) پاکستان نیشنل ریٹڈ شطرنج چیمپئن شپ (کل) اتوار کو پی ایس بی کوچنگ سینٹر لاہور میں کھیلی جائے گی۔ چیف آرگنائزر محمد شفیق کے مطابق چیمپئن شپ کے تمام انتظامات مکمل کر لئے گئے۔ چیمپئن شپ میں ملک بھر سے کھلاڑی حصہ لے رہے ہیں اور انٹری فیس 500 روپے مقرر کی گئی ہے ۔ چیمپئن شپ کے اختتام پر کامیابی حاصل کرنے والے 10 کھلاڑیوں میں کیش ایوارڈ تقسیم کئے جائیں گے۔

Reference: http://urdu.app.com.pk