زمبابوین بلے باز سین ولیمز نے یو اے ای کے خلاف تیسرے ون ڈے میں شاندار سنچری داغ دی

ہرارے۔ 14 اپریل (اے پی پی)زمبابوین بلے باز سین ولیمز نے متحدہ عرب امارات کے خلاف تیسرے ون ڈے انٹرنیشنل میچ میں شاندار سنچری داغ دی، یہ ان کے کیریئر کی تیسری سنچری ہے۔ اتوار کو یو اے ای کے خلاف کھیلے گئے تیسرے ایک روزہ میچ میں ولیمز نے ڈٹ کر حریف باﺅلرز کا مقابلہ کیا اور سنچری سکور کی، وہ 109 رنز بنا کر ناقابل شکست رہے۔

Reference: http://urdu.app.com.pk

تیسری خیبر زلمی ٹی ٹونٹی بلائنڈ کرکٹ چیمپئن ٹرافی (کل) سے شروع ہوگی

اسلام آباد ۔ 14 اپریل (اے پی پی) تیسری خیبر زلمی ٹی ٹونٹی بلائنڈ کرکٹ چیمپئن ٹرافی (کل) پیر سے شروع ہوگی جو 18 اپریل تک جاری رہے گی۔اسلام آباد بلائنڈ کرکٹ کلب کے صدر محمد بلال ستی نے بتایاکہ پشاور میں شیڈول ایونٹ میں ملک بھر سے چار ٹیمیں حصہ لے رہی ہیں جن میں میزبان پشاور، اسلام آباد، بہاولپور اور اوکاڑہ شامل ہیں۔ ایونٹ میں شرکت کے لئے اسلام آباد کی ٹیم پشاور پہنچ گئی۔ ایونٹ کے پہلے روز دو میچ کھیلے جائیں گے۔پہلا میچ اسلام آباد اور بہاولپور کے درمیان کھیلا جائے گا جبکہ دوسرے میچ میں اوکاڑہ اور پشاور کی ٹیمیں مد مقابل ہوں گی۔

Reference: http://urdu.app.com.pk

ویسٹ انڈیز کا سہ ملکی ون ڈے انٹرنیشنل سیریز کیلئے سکواڈ کا اعلان

کنگسٹن ۔ 13 اپریل (اے پی پی) کرکٹ ویسٹ انڈیز سلیکشن کمیٹی نے سہ ملکی ون ڈے انٹرنیشنل کرکٹ سیریز کیلئے سکواڈ کا اعلان کر دیا، فاسٹ باﺅلر شینن گبرائل، بلے باز جوناتھن کارٹر کی دوبارہ ٹیم میں واپسی ہوئی ہے، وکٹ کیپر بلے باز شین ڈورچ کی پہلی مرتبہ ون ڈے سکواڈ میں طلبی ہوئی ہے جبکہ سنیل ایمبرس، روسٹن چیس اور ریمون ریفر بھی سلیکٹرز کا اعتماد حاصل کرنے میں کامیاب رہے، کالی آندھی کو کرس گیل، آندرے رسل، کارلوس بریتھویٹ، شمرون ہٹمائر، اوشین تھامس اور نیکولاس پوران کی خدمات حاصل نہیں ہوں گی یہ تمام کھلاڑی آئی پی ایل کھیلنے میں مصروف ہیں۔ سہ ملکی ون ڈے سیریز 5 سے 17 مئی تک آئرلینڈ میں کھیلی جائے گی جس میں میزبان ٹیم کے علاوہ ویسٹ انڈیز اور بنگلہ دیش کی ٹیمیں ایکشن میں دکھائی دیں گی۔ اعلان کردہ سکواڈ کپتان جیسن ہولڈر، جان کیمپ بیل، ڈیرن براوو، شائی ہوپ، شیلڈن کوٹریل، شینن گبرائل، کیمر روچ، سنیل ایمبرس، ریمونڈ ریفر، فابین ایلن، ایشلے نرس، روسٹن چیس، شین ڈورچ اور جوناتھن کارٹر پر مشتمل ہے۔

Reference: http://urdu.app.com.pk

بنگلہ دیشی فاسٹ باﺅلر مستفیض الرحمان کی فٹنس مسائل کے باعث سہ ملکی ون ڈے انٹرنیشنل سیریز میں شرکت مشکوک

ڈھاکہ ۔ 13 اپریل (اے پی پی) بنگلہ دیشی فاسٹ باﺅلر مستفیض الرحمان کی فٹنس مسائل کے باعث آئندہ ماہ آئرلینڈ میں شیڈول سہ ملکی ون ڈے انٹرنیشنل کرکٹ سیریز میں شرکت مشکوک ہو گئی، وہ ٹخنے کی انجری میں مبتلا ہیں۔ سہ ملکی سیریز 5 سے 17 مئی تک آئرلینڈ میں کھیلی جائے گی جس میں بنگلہ دیش کے علاوہ میزبان ٹیم اور ویسٹ انڈیز کی ٹیمیں حصہ لیں گی۔ ورلڈ کپ سے قبل بنگلہ دیشی ٹیم کے کھلاڑیوں کو انجریز نے گھیر لیا ہے، محموداللہ، روبیل حسین، مہدی حسن اور سیف الدین کے بعد مستفیض کی انجری بھی بنگلہ دیش کیلئے تشویش کا باعث بن گئی ہے اور اسی وجہ سے ان کی سہ ملکی سیریز میں شرکت غیریقینی صورتحال کا شکار ہو گئی ہے۔ بنگلہ دیش کرکٹ بورڈ کے چیف فزیشین دیباشیش چوہدری نے بتایا ہے کہ ایکسرے رپورٹ کے بعد ڈاکٹرز نے فاسٹ باﺅلر کو دو ہفتوں تک مکمل آرام کا مشورہ دیا ہے جس کے باعث ان کی سہ ملکی سیریز میں شرکت کے بارے ابھی کچھ بھی کہنا قبل ازوقت ہو گا۔

Reference: http://urdu.app.com.pk

آئی سی سی ورلڈکپ ٹرافی کی سینٹورس مال میں نمائش

اسلام آباد ۔ 12 اپریل (اے پی پی) آئی سی سی ورلڈکپ ٹرافی کو نمائش کیلئے سینٹورس مال اسلام آباد میں پیش کیا گیا۔ لاہور میں 13 اور کراچی میں 14 اپریل کو ورلڈ کپ ٹرافی کی نمائش ہو گی۔ اس موقع پر شائقین نے پاکستان اور قومی کرکٹ ٹیم زندہ باد کے نعرے لگائے اور عالمی کپ میں پاکستان کی کامیابی کےلئے دعائیں کیں۔ پاکستان نے 1992ءمیں وزیراعظم پاکستان عمران خان کی قیادت میں کامیابی حاصل کی تھی۔ شائقین نے ٹرافی کے ساتھ سلفیاں بھی بنائیں۔

Reference: http://urdu.app.com.pk