مختلف بین الاقوامی ایونٹس کی تیاری کیلئے قومی جونیئر کھلاڑیوں کا تربیتی کیمپ اسلام آباد میں شروع ہوگیا

اسلام آباد ۔ 20 اگست (اے پی پی) پاکستان سکواش فیڈریشن کے زیر اہتمام مختلف بین الاقوامی ایونٹس کی تیاری کیلئے قومی جونیئر کھلاڑیوں کا تربیتی کیمپ مصحف علی سکواش کمپلیکس اسلام آباد میں شروع ہوگیا ہے۔ پاکستان سکواش فیڈریشن کے گیم ڈویلپمنٹ آفیسر سکواڈرن لیڈر عامر اقبال نے بتایا کہ تربیتی کیمپ میں 8 کھلاڑیوں نے رپورٹ کردی ہے جبکہ باقی 4 کھلاڑی بھی جلد کیمپ کو جوائن کر لیں گے۔ انہوں نے کہا کہ قومی کھلاڑیوں کیلئے یہ تربیتی کیمپ فیوچر پلاننگ اور ڈویلپمنٹ کیلئے لگایا ہے، کھلاڑیوں کو کوچز جدید اور اعلیٰ معیار کی تربیت دے رہے ہیں۔ انہوں نے کہا کہ انہی کھلاڑیوں میں سے باصلاحیت کھلاڑیوں کا انتخاب کر کے آنے والے عالمی مقابلوں کیلئے بھجوائیں گے۔

Reference: http://urdu.app.com.pk

سابق امریکی صدر باراک اوباما کی باسکٹ بال جرسی 1 کروڑ 92 لاکھ روپے میں فروخت

واشنگٹن ۔ 20 اگست (اے پی پی) سابق امریکی صدر باراک اوباما کی باسکٹ بال جرسی 1 کروڑ 92 لاکھ روپے میں فروخت کر دی گئی۔ ڈلاس آکشن ہاﺅس کی طرف سے جاری کردہ بیان کے بیان کے مطابق باراک اوباما ہاوائے میں پوناہو ہائی سکول میں 23 نمبر والی جرسی پہن کر باسکٹ بال کھیل میں حصہ لیا کرتے تھے۔ اوباما باسکٹ بال کھیل کے بڑے مداح تھے اور اپنے دور اقتدار میں بھی وائٹ ہاﺅس میں اکثر صدارتی عملے، مشہور شخصیات اور دیگر مہمانوں کے ساتھ باسکٹ بال کھیلتے ہوئے دیکھے جاتے تھے۔ ڈلاس آکشن ہاﺅس میں ان کی باسکٹ بال جرسی نیلامی کیلئے رکھی گئی تھی جہاں پر وہ 1 کروڑ اور 92 لاکھ روپے میں فروخت ہوئی۔ فروخت سے قبل جرسی کی ویلیو 1 لاکھ ڈالر تھی۔

Reference: http://urdu.app.com.pk

قومی ٹیم سائوتھ ایشین انڈر۔16 گرلز چیمپئن شپ میں شرکت کرے گی، مدثر آرائیں

اسلام آباد ۔ 19 اگست (اے پی پی) قومی ٹیم سائوتھ ایشین انڈر۔16 گرلز چیمپئن شپ میں شرکت کرے گی۔ پاکستان نیٹ بال فیڈریشن کے صدر مدثر آرائیں نے بتایاکہ چیمپئن شپ رواں سال 18 سے 22 اکتوبر سے کٹھمنڈو نیپال میں کھیلی جائے گی۔ چیمپئن شپ میں 6 ممالک کی ٹیموں کی کھلاڑی حصہ لیں گی جن میں پاکستان، میزبان نیپال، سری لنکا، بھارت، بنگلہ دیش اور نیپال شامل ہیں۔ 17 اکتوبر کو چیمپئن شپ میں شرکت کرنے والی ٹیموں کی منیجرز میٹنگ ہوگی جس میں چیمپئن شپ کے قوانین اور ڈراز کا اعلان کیا جائے گا۔ انہوں نے کہا کہ چیمپئن شپ کی تیاری کے سلسلہ میں قومی ٹیم کی کھلاڑیوں کا تربیتی کیمپ آئندہ ماہ کراچی میں لگایا جائے گا جس میں ملک بھر سے 25 کھلاڑیوں کو مدعو کیا جائے گا اور تربیتی کیمپ کے دوران کوچز اور کھلاڑیوں کو جدید اور اعلی تربیت دیں گے۔

Reference: http://urdu.app.com.pk

سری لنکا اور نیوزی لینڈ کے درمیان دوسرا کرکٹ ٹیسٹ میچ 22 اگست سے شروع ہوگا

کولمبو ۔ 19 اگست (اے پی پی) سری لنکا اور نیوزی لینڈ کی کرکٹ ٹیموں کے درمیان دو ٹیسٹ میچوں پر مشتمل سیریز کا دوسرا اور آخری ٹیسٹ میچ 22 اگست سے کولمبو کے مقام پر شروع ہوگا۔ میزبان ٹیم کو کیویز کے خلاف دو میچوں کی سیریز میں 1-0 کی برتری حاصل ہے۔ سری لنکن ٹیم نے پہلے ٹیسٹ میچ میں نیوزی لینڈ کی ٹیم کو 6 وکٹوں سے شکست دیکر دو میچوں کی سیریز میں 1-0 کی برتری حاصل کر رکھی ہے۔ آئی لینڈرز ٹیم کے کپتان کا کہنا ہے کہ کیویز کے خلاف پہلا ٹیسٹ جیت انکی ٹیم کے حوصلے میں اضافہ ہوا ہے۔ انہوں نے کہا کہ انکی ٹیم کو کیویز کو دوسرے ٹیسٹ میچ مین بھی شکست دیکر دو میچوں کی سیریز میں کلین سویپ کریگی۔ واضح رہے کہ دونوں ٹیموں کے درمیان دوسرا اور آخری ٹیسٹ میچ 22 سے 26 اگست تک کولمبو میں کھیلا جائے گا۔ اس کے بعد ٹی ٹونٹی انٹرنیشنل سیریز سے قبل 29 اگست کو نیوزی لینڈ کی ٹیم پریکٹس میچ کھیلے گی جس کے بعد نیوزی لینڈ اور سری لنکا کے درمیان ٹی ٹونٹی سیریز کا پہلا میچ یکم ستمبر، دوسرا میچ 3 ستمبر جبکہ تیسرا اور آخری میچ 6 ستمبر کو کھیلا جائے گا۔

Reference: http://urdu.app.com.pk

قومی کراٹے چیمپئن شپ 22 اگست سے شروع ہوگی

اسلام آباد ۔ 19 اگست (اے پی پی) قومی کراٹے چیمپئن شپ 22 اگست سے لاہور میں شروع ہوگی۔ پاکستان واپڈ کی ٹیم چیمپئن شپ میں ٹائٹل کا دفاع کرے گی۔ گذشتہ روز پاکستان کراٹے فیڈریشن کی سیکرٹری جنرل عندلیب سندھو نے ”اے پی پی” سے گفتگو کرتے ہوئے بتایاکہ ملک بھر سے نو مردوں اور خواتین کھلاڑیوں کی ٹیمیں چیمپئن شپ میں حصہ لیں گے۔ ان ٹیموں میں دفاعی چیمپئن پاکستان واپڈا، پاکستان آرمی، پاکستان ریلویز، پاکستان پولیس، بلوچستان، سندھ، پنجاب، خیبر پختونخوا اور اسلام آباد شامل ہیں۔ چیمپئن شپ میں شرکت کے حوالے تمام ٹیموں کو دعوت نامے جاری کردے گئے ہیں۔ چیمپئن شپ میں چار کیٹگریز کے مقابلے رکھے گئے ہیں جن میں انفرادی کومتے، ٹیم کومتے، انفرادی کاتا اور ٹیم کاتا شامل ہیں۔ چیمپئن شپ 25 اگست تک جاری رہے گی اور چیمپئن شپ کے اختتام پر کامیابی حاصل کرنے والی ٹیموں کے کھلاڑیوں میں انعامات تقسیم کئے جائیں گے۔

Reference: http://urdu.app.com.pk