ہمارے پاس ورلڈ کپ جیتنے کیلئے منصوبہ ہے، ٹورنامنٹ کیلئے مضبوط اور متوازن سکواڈ تشکیل دیا گیا ہے ، میگا ایونٹ جیت کر قوم کو تحفہ پیش کرینگے، آرون فنچ

کینبرا ۔ 16 اپریل (اے پی پی) آسٹریلین کرکٹ ٹیم کے کپتان آرون فنچ نے کہا ہے کہ عالمی کپ کرکٹ ٹورنامنٹ 2019ءکے لئے مضبوط اور متوازن ٹیم کا انتخاب کیا گیا ہے۔ انہوں نے کہا کہ ورلڈ کپ جیتنے کیلئے ہماری ٹیم منصوبہ ہے اسلئے ہماری کوشش ہے کہ میگا ایونٹ جیت کر ملک و قوم کو تحفہ دیں۔ انہوں نے امید ظاہر کی ہے کہ کھلاڑی میگا ایونٹ میں سو فیصد کارکردگی کا مظاہرہ کرتے ہوئے ٹیم کی فتحوحات میں اہم کردار ادا کرینگے۔ اپنے ایک بیان میں آسٹریلوی قائد نے کہا کہ آئی سی سی کرکٹ ورلڈ کپ 2019ءکے لئے بہترین سکواڈ کا انتخاب کیا گیا ہے جس وہ بالکل مطمئن ہیں۔ انہوں نے کہا کہ انکی ٹیم میگا ایونٹ میں شاندار کارکردگی کا مظاہرہ کرتے ہوئے اپنے ٹائٹل کا بھرپور دفاع کریگی تاہم انہوں نے اپنی ٹیم کو خبردار کیا ہے کہ اس مقصد کے حصول کے لئے پوری ٹیم کو سردھڑ کی بازی لگانا ہوگی۔ ایک سوال کے جواب میں انہوں نے کہا کہ ڈیوڈ وارنر اور سٹیون سمتھ کے آنے سے ٹیم مضبوط ہوگئی ہے۔ انہوں نے کہا کہ سلیکشن کمیٹی نے ورلڈ کپ کیلئے جو 15 کھلاڑیوں پر مشتمل مضبوط اور متوازن سکواڈ تشکیل دیا ہے اس سے مطمئن ہوں۔ انہوں نے کہا کہ سکواڈ میں ایسے کھلاڑی موجود ہیں جو ورلڈ کپ جتوانے کی بھرپور صلاحیت رکھتے ہیں۔

Reference: http://urdu.app.com.pk

اعصام الحق قریشی نے ہوسٹن اوپن ٹینس ٹورنامنٹ مینز ڈبلز ٹائٹل جیت لیا

ہوسٹن ۔ 15 اپریل (اے پی پی) سٹار پاکستانی کھلاڑی اعصام الحق قریشی نے فتوحات برقرار رکھتے ہوئے ہوسٹن اوپن ٹینس ٹورنامنٹ مینز ڈبلز ٹائٹل جیت لیا۔ انہوں نے فائنل میں سکپ سکی برادران پر مشتمل برطانوی جوڑی کو شکست دیکر ٹائٹل اپنے نام کرلیا۔ امریکہ میں جاری ایونٹ میں کھیلے گئے مینز ڈبلز فائنل میں اعصام الحق اور ان کے میکسیکن جوڑی دار سنتیاگو گونزالیز نے شاندار کھیل پیش کرتے ہوئے سکپ سکی برادران پر مشتمل برطانوی جوڑی کو شکست دی۔ ان کی فتح کا سکور 3-6، 6-4 اور 10-6 تھا۔ اپنی کامیابی پر خوشی کا اظہار کرتے ہوئے اعصام الحق قریشی نے کہا کہ وہ اس فتح پر بہت خوش ہیں اور مستقبل میں بھی اپنی عمدہ کارکردگی کے تسلسل کو برقرار رکھیں گے۔

Reference: http://urdu.app.com.pk

زمبابوے اور یو اے ای کے درمیان ون ڈے انٹرنیشنل سیریز کا چوتھا اور آخری میچ (کل) کھیلا جائے گا

ہرارے ۔ 15 اپریل (اے پی پی) زمبابوے اور متحدہ عرب امارات کی کرکٹ ٹیموں کے درمیان چار ون ڈے انٹرنیشنل میچوں پر مشتمل سیریز کا چوتھا اور آخری میچ (کل) منگل کو ہرارے میں کھیلا جائے گا۔ زمبابوے کی ٹیم کو یو اے ای کے خلاف چار میچوں کی سیریز میں 3-0 کی فیصلہ کن برتری حاصل ہے۔ زمبابوے کی ٹیم نے پہلے میچ میں مہمان ٹیم کو 7 وکٹوں سے شکست دی، دوسرے میچ میں زمبابوے کی ٹیم نے یو اے ای کو 4 رنز سے ہرایا جبکہ تیسرے میچ میں میزبان ٹیم نے یو اے ای کو 131 رنز سے شکست دیکر چار میچوں کی سیریز میں 3-0 کی فیصلہ کن برتری حاصل کرلی ہے۔ زمبابوے نے ابتدائی طور پر افغانستان کے خلاف ون ڈے انٹرنیشنل سیریز کی میزبانی کرنی تھی تاہم میچز کی نشریات کے حوالے سے اختلافات کی وجہ سے سیریز کو منسوخ کر دیا گیا تھا جس کے بعد زمبابوین بورڈ نے یو اے ای کے خلاف سیریز طے کر لی تھی۔ واضح رہے کہ زمبابوے اور یو اے ای کے درمیان چار میچوں کی سیریز کا چوتھا اور آخری میچ 16 اپریل کو کھیلا جائے گا۔ سیریز کے چاروں میچ ہرارے میں ہی کھیلے جائیں گے۔

Reference: http://urdu.app.com.pk

قومی والی بال چیمپئن شپ (کل) شروع ہوگی

اسلام آباد ۔ 14 اپریل (اے پی پی) پاکستان والی بال فیڈریشن کے زیراہتمام قومی والی بال چیمپئن شپکل ( پیر سے) لاہور میں شروع ہوگی، چیمپئن شپ کا افتتاح پاکستان اولمپک ایسوسی ایشن کے صدر لیفٹیننٹ جرنل(ر) سید عارف حسن کریں گے۔ پاکستان والی بال فیڈریشن کے سیکرٹری جنرل شاہ نعیم ظفر نے بتایا کہ چیمپئن شپ میں ملک بھر سے سترہ ٹیمیں حصہ لے رہی ہیں جن میں پاکستان آرمی، پاکستان نیوری، پاکستان ایئرفورس، پاکستان واپڈا، پاکستان پولیس، پاکستان ریلوے، پاکستان بورڈ، ہائرایجوکیشن کمیشن، پی او ایف واہ، پنجاب، سندھ، بلوچستان، خیبرپختونخواہ، اسلام آباد، فاٹا، آزادجموں و کشمیر اور گلگت بلتستان کی ٹیمیں شامل ہیں۔ چیمپئن شپ 21 اپریل تک جاری رہے گی،اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔

Reference: http://urdu.app.com.pk

انگلینڈ کے خلاف ایشز سیریز میں آسٹریلوی ٹیم میں کم بیک کرنا ہدف ہے، بینکرافٹ

میلبورن۔ 14 اپریل (اے پی پی)آسٹریلوی بلے باز کیمرون بینکرافٹ نے کہا ہے کہ رواں برس انگلینڈ کے خلاف شیڈول ایشز سیریز میں ٹیم میں کم بیک کرنا ہدف ہے اور مقصد کے حصول کیلئے سخت محنت کروں گا۔ بینکرافٹ ان دنوں کاﺅنٹی کرکٹ میں ڈرھم کی قیادت کر رہے ہیں۔ گزشتہ سال دورہ جنوبی افریقہ کے دوران بال ٹیمپرنگ کرنے پر کرکٹ آسٹریلیا نے بینکرافٹ پر 9 ماہ کی پابندی عائد کی تھی جو دسمبر میں ختم ہو گئی تھی لیکن اب انہیں ٹیم میں کم بیک کا چیلنج درپیش ہے۔ اپنے ایک بیان میں انہوں نے کہا کہ بین الاقوامی سطح پر ملک کی نمائندگی میرے لئے باعث اعزاز ہے، میں خود کو خوش قسمت سمجھتا ہوں کہ مجھے ٹیم کی نمائندگی کا موقع ملا اور اب میں دوبارہ آسٹریلوی ٹیم کی نمائندگی کیلئے بے چین ہوں۔ ان کا کہنا ہے کہ بال ٹیمپرنگ کا واقع ماضی کا حصہ بن چکا ہے، اب تمام تر توجہ اپنی کارکردگی کو بہتر بنانے پر مرکوز ہے، میں تینوں طرز کی کرکٹ کھیلنا پسند کرتا ہوں تاہم اس وقت میرا ہدف ایشز سیریز میں کم بیک کرنا ہے اور مقصد کے حصول کیلئے سرتوڑ کوشش کروں گا۔

Reference: http://urdu.app.com.pk