تازہ ترین آئی سی سی ون ڈے ٹیم رینکنگ، انگلش ٹیم بدستور پہلے نمبر پر براجمان

دبئی ۔ 20 فروری (اے پی پی) انگلش ٹیم انٹرنیشنل کرکٹ کونسل (آئی سی سی) کی تازہ ترین ون ڈے ٹیم رینکنگ میں بدستور پہلے نمبر پر براجمان ہے، نیوزی لینڈ نے ایک درجہ ترقی پا کر دوبارہ تیسری پوزیشن حاصل کر لی، پاکستانی ٹیم پانچویں نمبر پر برقرار ہے۔ بدھ کو آئی سی سی نے نیوزی لینڈ اور بنگلہ دیش کے درمیان ون ڈے سیریز ختم ہونے کے بعد ٹیموں کی تازہ ترین رینکنگ جاری کر دی جس کے تحت انگلش ٹیم بدستور سرفہرست ہے، بھارتی ٹیم دوسرے نمبر پر موجود ہے، نیوزی لینڈ کی ٹیم بنگلہ دیش کو ون ڈے سیریز میں وائٹ واش کرنے کے بعد ایک سیڑھی چڑھ کر دوبارہ تیسرے نمبر پر پہنچ گئی ہے جبکہ اس نے جنوبی افریقہ کو چوتھے نمبر پر دھکیل دیا ہے، پاکستانی ٹیم پانچویں نمبر پر موجود ہے، آسٹریلیا کا چھٹا نمبر ہے جبکہ شکست خوردہ بنگلہ دیشی ٹیم شکست کے باوجود ساتویں نمبر پر موجود ہے۔

Reference: http://urdu.app.com.pk

آئی سی سی نے سرفراز احمد کو سپاٹ فکسنگ کی پیشکش کرنے پر عرفان انصاری پر 10 سال کی پابندی عائد کردی

لاہور ۔ 20 فروری (اے پی پی) انٹرنیشنل کرکٹ کونسل (آئی سی سی) نے قومی ٹیم کے کپتان سرفراز احمد کو سپاٹ فکسنگ کی پیشکش کرنے پر عرفان انصاری پر 10 سال کی پابندی عائد کردی۔ عرفان انصاری نے اکتوبر 2017ءمیں پاکستان اور سری لنکا کے مابین ون ڈے سیریز کے دوران سرفراز احمد کو فکسنگ کرنے پر آمادہ کرنے کی کوشش کی تھی لیکن انہوں نے پیشکش ٹھکراتے ہوئے فوری طور پر اس پیشکش کی رپورٹ آئی سی سی کے اینٹی کرپشن یونٹ کو کر دی تھی جس کے بعد آئی سی سی اینٹی کرپشن یونٹ نے تحقیقات کا آغاز کر دیا تھا۔

Reference: http://urdu.app.com.pk

، نیوزی لینڈ نے بنگلہ دیش کو 88 رنز سے شکست دے کر سیریز میں 3-0 سے وائٹ واش کر دیا،

ڈونیڈن۔ 20 فروری (اے پی پی) ٹم سائوتھی کی تباہ کن بائولنگ کی بدولت نیوزی لینڈ نے بنگلہ دیش کو تیسرے اور آخری ون ڈے انٹرنیشنل میچ میں با آسانی 88 رنز سے شکست دے کر سیریز میں 3-0 سے وائٹ واش کر دیا، کیویز نے پہلے کھیلتے ہوئے مقررہ اوورز میں6 وکٹوں کے نقصان پر 330 رنز بنائے، روز ٹیلر، ہنری نیکولز اور ٹام لیتھم نے نصف سنچریاں بنا کر ٹیم کی پوزیشن مستحکم کی، جواب میں بنگلہ دیشی ٹیم مطلوبہ ہدف حاصل کرنے میں ناکام رہی اور 48ویں اوور میں 242 رنز بنا کر آئوٹ ہو گئی، صابر رحمان کے سوا بنگال ٹائیگرز کا کوئی بھی بلے باز خاطرخواہ کارکردگی کا مظاہرہ نہ کر سکا، صابر رحمان نے ٹیم کو کامیابی دلانے کیلئے سرتوڑ کوشش کی لیکن ان کی سنچری بھی ٹیم کو شکست سے نہ بچا سکی، وہ 102 رنز بنا کر ٹاپ سکورر رہے، سائوتھی نے 6 کھلاڑیوں کو پویلین کی راہ دکھائی، سائوتھی میچ اور مارٹن گپٹل سیریز کے بہترین کھلاڑی قرار پائے۔

Reference: http://urdu.app.com.pk

پی ایس ایل فور کے فائنل، ایلیمنیٹر اور کوالیفائر میچز کے آن لائن 500 و1000روپے مالیت کے ٹکٹ آدھے گھنٹے میں فروخت

لاہور۔20فروری(اے پی پی )پاکستان سپر لیگ کے فائنل، ایلیمنیٹر اور کوالیفائیر میچز کے آن لائن ٹکٹوں کی فروخت کا شائقین اتنی بے تابی سے انتظار کر رہے تھے کہ ٹکٹوں کی بیس فیصد آن لائن فروخت شروع ہونے کے صرف آدھے گھنٹے میں ہی 500 اور ایک ہزار روپے والے ٹکٹس فروخت ہوگئے جبکہ 2000، 2500 اور 3000 ہزار روپے والے ٹکٹس فروخت کیلئے موجود ہیں۔فائنل، ایلیمنیٹر اور کوالیفائر میچز کے ٹکٹس کا 20 فیصد حصہ آن لائن فروخت کیا جارہا ہے جب کہ پی ایس ایل انتظامیہ کی جانب سے مختص کردہ سنٹرز پر ٹکٹس کی فروخت 25 فروری سے شروع ہوگی۔

Reference: http://urdu.app.com.pk

پاکستان اور سری لنکا کی بلائنڈ کرکٹ ٹیموں کے مابین سیریز کا آغاز(کل )سے ہوگا ،ٹیم کولمبوپہنچ گئی

لاہور۔20فروری(اے پی پی )پاکستان اور سری لنکا کی بلائنڈ کرکٹ ٹیموں کے مابین ون ڈے اورٹی ٹوئنٹی میچز کی سیریز کا آغا ز کل 21فروری سے سری لنکا کے شہر کولمبو میں ہوگا جس میں شرکت کیلئے پاکستان بلائنڈکرکٹ ٹیم بدھ کی صبح کولمبو پہنچ گئی ۔کولمبوپہنچنے پرٹیم کا استقبال کیا گیا۔ ایئرپورٹ پربلائنڈکرکٹ ایسوسی ایشن آف سری لنکا کے سیکرٹری چمندا پشپا ودیگرعہدیداران نے پاکستانی کھلاڑیوں کوپھولوں کے گلدستے پیش کئے ۔قومی ٹیم کوہوٹل پہنچنے پرہارپہنائے گئے، اس موقع پرقومی کھلاڑیوں نے سری لنکا کی روایتی شمعیں روشن کیں ۔

Reference: http://urdu.app.com.pk