سابق کپتان مصباح الحق کی پریس کانفرنس

قومی کرکٹ ٹیم کی ہیڈ کوچنگ کے امیدوار مصباح الحق نے کرکٹ کمیٹی چھوڑنے کا اشارہ دے دیا
ہیڈ کوچ کیلئے درخواست جمع نہیں کروائی۔ ابھی تک افواہیں چل رہی ہیں، چیف سلیکٹر اور کوچ ایک ہونا چاہیے، اس میں ذمہ داری کا بوجھ ضرور بڑھے گا لیکن معاملات پر نظر رکھنے میں آسانی ہوگی،مصباح الحق لاہور۔21 اگست(اے پی پی ) سابق کپتان مصباح الحق نے کہا ہے کہ ہیڈ کوچ کیلئے ابھی درخواست جمع نہیں کروائی۔ ابھی تک افواہیں چل رہی ہیں۔چیف سلیکٹر اور کوچ ایک ہونا چاہیے۔ اس میں ذمہ داری کا بوجھ ضرور بڑھے گا لیکن معاملات پر نظر رکھنے میں آسانی ہوگی۔ لیول ٹوکورس کر رکھا ہے۔کوچنگ کیلئے درخواست دی تو کرکٹ کمیٹی کی رکنیت چھوڑ دونگا، ان خیالات کا اظہار انہوں نے گذشتہ روز قذافی سٹیڈیم میں میڈیا سے بات کرتے ہوئے کیا۔انکا کہنا تھا کہ اگر کوچ یا سلیکٹر کے عہدوں میں سے ایک کا انتخاب کرنا پڑا تو استخارہ کرونگا۔ ایک سوال کے جواب میں انہوں نے کہا کہ صوبائی ٹیموں کیلئے پول گزشتہ کارکردگی کی بنیاد پر تیار کیا گیا تھا۔کوشش کریں گے کہ 3رکنی کمیٹی فہرست پر نظرثانی کرتے ہوئے میرٹ پر فیصلے کرے۔ لاہور میں جاری پری سیزن کیمپ میں کئی کھلاڑیوں کو نظر انداز کرنے کے سوال پر انہوںنے کہا کہ فی الحال سب سے زیادہ توجہ سینٹرل کنٹریکٹ یافتہ کرکٹرز پر دی گئی ہے۔ چند مزید پرفارمرز میں بھی موقع دیا گیا ہے۔

Reference: http://urdu.app.com.pk

ایشز سیریز جیتنے کیلئے آئے ہیں، بلے بازوں کو باﺅنسرز کا خوف نہیں، سمتھ کی کمی محسوس ہو گی، جسٹن لینگر

لیڈز ۔ 21 اگست (اے پی پی)آسٹریلوی ٹیم کے کوچ جسٹن لینگر نے کہا ہے کہ ہماری ٹیم انگلینڈ کے خلاف ایشز سیریز جیتنے کیلئے آئی ہوئی ہے، بلے بازوں کو حریف باﺅلرز کے باﺅنسرز کا خوف نہیں البتہ ٹیم تیسرے ٹیسٹ میچ میں سٹیون سمتھ کی کمی محسوس کرے گی۔ سمتھ دوسرے ٹیسٹ کی پہلی اننگز میں جوفرا آرچر کا باﺅنسر لگنے سے گردن کی انجری کا شکار ہوئے تھے۔ آسٹریلیا اور انگلینڈ کے درمیان تیسرا ٹیسٹ میچ (کل) جمعرات سے شروع ہو گا اور کینگروز کو پانچ میچوں کی سیریز میں 1-0 کی برتری حاصل ہے۔ اپنے ایک بیان میں انہوں نے کہا کہ انگلش ٹیم سیریز میں کم بیک کرنے کیلئے ہر حربہ استعمال کرے گی اسلئے کھلاڑیوں کو آگاہ کر دیا ہے کہ کھیل کے تینوں شعبوں میں ڈٹ کر مقابلہ کرنے کیلئے تیار رہیں۔

Reference: http://urdu.app.com.pk

پاکستانی کرکٹ ٹیم آئندہ سال انگلینڈ کا دورہ کرے گی

اسلام آباد ۔ 21 اگست (اے پی پی) پاکستانی کرکٹ ٹیم آئندہ سال جولائی میں انگلینڈ کا دورہ کرے گی جہاں پر وہ میزبان ٹیم کے خلاف تین ٹیسٹ اور تین ٹی ٹونٹی انٹرنیشنل میچوں کی سیریز کھیلے گی۔ انگلینڈ اینڈ ویلز کرکٹ بورڈ (ای سی بی) نے آئندہ سال پاکستان کے خلاف مجوزہ سیریز کے شیڈول کا اعلان کر دیا ہے جس کے تحت آئی سی سی ورلڈ ٹیسٹ چیمپئن شپ کے سلسلے میں دونوں ٹیموں کے درمیان تین ٹیسٹ میچز کھیلے جائیں گے، دونوں ٹیموں کے درمیان پہلا ٹیسٹ میچ 30 جولائی سے 3 اگست تک لارڈز، دوسرا ٹیسٹ میچ 7 سے 11 اگست تک اولڈ ٹریفورڈ جبکہ تیسرا اور آخری ٹیسٹ میچ 20 سے 24 اگست تک ٹرینٹ برج میں کھیلا جائے گا۔ اس کے بعد دونوں ٹیمیں تین ٹی ٹونٹی انٹرنیشنل میچوں کی سیریز میں آمنے سامنے ہوں گی، دونوں ٹیموں کے درمیان پہلا میچ 29 اگست، دوسرا میچ 31 اگست جبکہ تیسرا اور آخری میچ 2 ستمبر کو کھیلا جائے گا۔

Reference: http://urdu.app.com.pk

سرفرنگا کولڈ ڈیزرٹ ریلی 23 سے 25 اگست تک گلگت۔بلتستان کے علاقے شگر میں ہوگی

اسلام آباد ۔ 21 اگست (اے پی پی) سرفرنگا کولڈ ڈیزرٹ ریلی 23 سے 25 اگست تک گلگت ۔بلتستان کے علاقے شگر(سکردو)میں منعقد ہوگی۔گلگت بلتستان سیکریٹریٹ انفارمیشن ڈیپارٹمنٹ کی جانب سے جاری کردہ تفصیلات کے مطابق سرفرنگا جیپ ریلی میں 23اگست کو تمام گاڑیوں کا معائنہ کیا جائے گا،24 کو کوالیفائنگ رائونڈ جبکہ 25 اگست کو ریلی کا انعقاد کیا جائے گا۔سرفرنگا کولڈ ڈیزرٹ ریلی کی سیاحت کے فروغ میں اہمیت کو مدنظر رکھتے ہوئے محکمہ سیاحت حکومت گلگت ۔بلتستان نے اس سال 23تا 25 اگست 2019ء کو اس میلے کا انعقاد کا فیصلہ کیا ہے جس میں نہ صرف پاکستانی ڈرائیور شرکت کریں گے بلکہ بین الاقوامی شہرت کے حامل ڈرائیورز کو بھی ریس میں مقابلے کے لئے مدعو کیا گیا ہے۔اس سال ریس ٹریک کی لمبائی کو 40کلو میٹر سے بڑھا کر 60 کلو میٹر تک بڑھایا جائے گا ۔ نیز ریس کے ساتھ ساتھ علاقے کے رنگا رنگ ثقافتی شوز اور روایتی کھانے پینے کی اشیاء کی نمائش اس میلے کا اہم حصہ ہوں گے۔سرفرنگا کولڈ ڈیزرٹ ریلی کے کامیاب انعقاد اور اس میلے کی پائیداری تب ہی ممکن ہے جب حکومتی اداروں کے ساتھ علاقے میں کام کرنے والے دیگر غیر سرکاری ادارے ، مالیاتی ادارے اور سب سے بڑھ کر عوام اور عوامی حلقے حکومت کا ساتھ دیں۔سال 2017ء میں منعقد ہونے والی سرفرنگا کولڈ ڈیزرٹ ریلی نہ صرف پاکستان بلکہ پورے دنیا میں مشہور ہوا اور دوسرے ہی سال میں یہ پاکستان کی دوسری بڑی ریلی بن گئی ہے۔سرفرنگا کولڈ ڈیزرٹ ریلی 2017ء اور 2018ء کے کامیاب انعقاد کے بعد پاکستان اور گلگت ۔بلتستان دنیا کے سیاحتی نقشے پر ایک منفرد سیاحتی مقام کے طور پر اجاگر ہوا اور اس میلے کے انعقاد کی وجہ سے ہی بلتستان ریجن کی خوبصورت، رنگا رنگ اور جداگانہ ثقافت کی پوری دنیا میں تشہیر ہوگئی نیز ملک اور علاقے کا روشن چہرہ پوری دنیا کے سامنے روشناس ہوا۔یہاں پر اس امر کو بھی اجاگر کرنا انتہائی لازمی ہے کہ 2017ء اور 2018ء میں سرفرنگا کولڈ ڈیزرٹ ریلی کے انعقاد کے حوالے سے حکومتی خزانے سے کم سے کم فنڈز لئے گئے جبکہ اس میلے کے اکثر اخراجات پرائیویٹ اداروں اور کمپنیوں کی مالی معاونت کے ذریعے پورے کئے گئے جو کہ بالعموم گلگت ۔بلتستان اور بالالخصوص بلتستان ریجن میں کام کرنے والے تمام نجی اداروں کی بھی کامیابی تھی۔

Reference: http://urdu.app.com.pk

ثام قیوری، فیلسیانو لوپیز، ڈینس شاپووالو اور سٹیو جانسن ونسٹن سیلم اوپن ٹینس ٹورنامنٹ مینز سنگلز پری کوارٹر فائنل میں پہنچ گئے

واشنگٹن ۔ 21 اگست (اے پی پی) امریکہ کے ثام قیوری، سپین کے فیلسیانو لوپیز، کینیڈا کے ڈینس شاپووالو اور امریکہ کے ہی سٹیو جانسن فتوحات کو برقرار رکھتے ہوئے ونسٹن سیلم اوپن ٹینس ٹورنامنٹ مینز سنگلز پری کوارٹر فائنل رائونڈ میں پہنچ گئے جبکہ ڈین ایوانز اور البرٹ راموس رائونڈ 32 میچز میں اپ سیٹ شکست کے بعد ایونٹ سے باہر ہوگئے۔ امریکہ میں جاری اے ٹی پی ایونٹ کے مینز سنگلز رائونڈ 32 میچز میں میزبان کھلاڑی ثام قیوری نے شاندار کارکردگی کا مظاہرہ کرتے ہوئے ہسپانوی ٹینس سٹار روبرٹو کاربالس کو سٹریٹ سیٹس میں 6-3 اور 7-5 سے ہرا کر ایونٹ کے پری کوارٹر فائنل کے لئے کوالیفائی کرلیا۔ سپین کے فیلسیانو لوپیز نے عمدہ کھیل پیش کرتے ہوئے ہم وطن حریف کھلاڑی پابلو اینڈیوجار کو 6-4، 1-6 اور 7-5 سے مات دی۔ کینیڈا کے سیکنڈ سیڈڈ کھلاڑی ڈینس شاپووالو نے اپنی عمدہ کارکردگی کی بدولت میزبان کھلاڑی ٹینیز سینڈگرن کو سٹریٹ سیٹس میں 6-2 اور 6-4 سے ہرا کر ایونٹ کے ٹاپ 16 رائونڈ کے لئے کوالیفائی کرلیا۔ رائونڈ 32 کے دیگر میچز میں امریکہ کے سٹیو جانسن، فرانسس تائیفو اور روس کے اینڈری روبلو فاتح قرار پائے اور ایونٹ کے پری کوارٹر فائنل رائونڈ میں پہنچ گئے۔

Reference: http://urdu.app.com.pk