چاول کی برآمدات میں دسمبر 2018ء کے دوران 23.8 فیصد کا اضافہ

اسلام آباد ۔ 17 جنوری (اے پی پی) رواں مالی سال کے دوران دسمبر میں چاول کی برآمدات میں 23.8 فیصد کا اضافہ ہوا ہے۔ پاکستان بیورو برائے شماریات (پی بی ایس) کی طرف سے جاری اعدادو شمار کے مطابق دسمبر 2017 ء میں 17 کروڑ 34 لاکھ ڈالر کے چاول برآمد کئے گئے جبکہ رواں مالی سال کے دوران دسمبر 2018ء میں چاول کی درآمدات کا حجم 21 کروڑ 48 لاکھ ڈالر ریکارڈ کیا گیا۔

Reference: http://urdu.app.com.pk

آبی ذخائر میں پانی کی آمد اور اخراج کی صورتحال

اسلام آباد ۔ 10 جنوری (اے پی پی) واپڈا نے مختلف آبی ذخائر میں پانی کی آمد اور اخراج کے اعدادو شمار جاری کردیئے ہیں ۔ جمعرات کو واپڈا سے جاری ہونے والے اعدادو شمار کے مطابق دریائے سندھ میں تربیلا کے مقام پر پانی کی آمد 13500کیوسک اور اخرج 3000کیوسک، دریائے کابل میں نوشہرہ کے مقام پر پانی کی آمد4600 کیوسک اور اخراج4600 کیوسک، دریائے جہلم میں منگلاکے مقام پر پانی کی آمد6100کیوسک اور اخراج5000کیوسک، دریائے چناب میں مرالہ کے مقام پر پانی کی آمد6600کیوسک اور اخراج6600کیوسک رہا۔ تربیلا ڈیم کا کم از کم آپریٹنگ لیول 1386فٹ، ڈیم میں پانی کی موجودہ سطح1428.92 فٹ، ڈیم میں پانی ذخیرہ کرنے کی انتہائی سطح 1550فٹ اورقابلِ استعمال پانی کا ذخیرہ 0.775 ملین ایکڑ فٹ۔منگلاڈیم کا کم از کم آپریٹنگ لیول 1050فٹ، ڈیم میں پانی کی موجودہ سطح 1110.55 فٹ،ڈیم میں پانی ذخیرہ کرنے کی انتہائی سطح 1242فٹ اور قابل استعمال پانی کا ذخیرہ 0.569 ملین ایکڑ فٹ۔ چشمہ ڈیم کا کم از کم آپریٹنگ لیول 638.15فٹ، ڈیم میں پانی کی موجودہ سطح 641.70 فٹ، ڈیم میں پانی ذخیرہ کرنے کی انتہائی سطح 649 فٹ اورقابل استعمال پانی کا ذخیرہ 0.053 ملین ایکڑ فٹ ہے۔

Reference: http://urdu.app.com.pk

سپارکو کے ترقیاتی کاموں کیلئے 3 ارب 11 کروڑ روپے جاری

اسلام آباد ۔ 7 جنوری (اے پی پی) وزارت منصوبہ بندی ترقی و اصلاحات نے سرکاری شعبہ کے ترقیاتی پروگراموں میں سپارکو کے ترقیاتی کاموں کیلئے مجموعی طور پر اب تک تین ارب 11 کروڑروپے سے زیادہ کے فنڈز جاری کر دیئے گئے ہیں۔ حکومت نے اس کے ترقیاتی کاموں کیلئے رواں مالی سال کے دوران 2 ارب 90 کروڑ روپے سے زائد کے فنڈز مختص کئے ہیں جبکہ غیرملکی امداد کی مد سے دو ارب 62 کروڑ روپے سے زیادہ فنڈز مختص کئے گئے ہیں۔ پلاننگ کمیشن کی طرف سے جاری کردہ اعدادوشمار کے مطابق حکومت نے پاکستان ریموٹ سین سینگ سیٹلائٹ کراچی ، لاہوراور اسلام آباد کیلئے 41کروڑ 34 لاکھ ، گلگت بلتستان میں ریسرچ سینٹر کیلئے 8کروڑ روپے سمیت مختلف ترقیاتی منصوبوں کیلئے فنڈز جاری کر دیئے ہیں۔

Reference: http://urdu.app.com.pk

سبزیوں کی برآمدات میں پانچ ماہ کے دوران 47.90 فیصداضافہ ہوا، شماریات بیورو

اسلام آباد ۔ 03جنوری(اے پی پی)رواں مالی سال 2018-19ءکے ابتدائی پانچ ماہ میں جولائی تا نومبر کے دوران سبزیوں کی قومی برآمدات میں 47.90 فیصد کا اضافہ ہوا ہے۔ ادارہ برائے شماریات پاکستان (پی بی ایس) کے اعدادوشمار کے مطابق جاری مالی سال میں جولائی تا نومبر 2018ءکے دوران سبزیوں کی برآمدات کا حجم 6 کروڑ 74لاکھ 73ہزار ڈالر تک پہنچ گیا۔ جبکہ گزشتہ مالی سال میں جولائی تا نومبر 2017ءکے دوران سبزیوں کی برآمدات سے 4 کروڑ 56لاکھ 21ہزار ڈالر کا زرمبادلہ کمایا گیا تھا۔اس طرح گزشتہ مالی سال کے مقابلہ میں جاری مالی سال کے دوران سبزیوں کی برآمدات میں 47.90 فیصد کا نمایاں اضافہ ریکارڈ کیا گیا۔

Reference: http://urdu.app.com.pk