سیمنٹ کی برآمدات میں 8 ماہ کے دوران 52.30 فیصد اضافہ

اسلام آباد ۔ 12 اپریل (اے پی پی) رواں مالی سال کے 8 ماہ کے دوران سیمنٹ کی برآمدات میں 52.30 فیصد اضافہ ہو گیا۔ آل پاکستان سیمنٹ مینوفیکچرنگ ایسوسی ایشن کے جاری کردہ اعداد و شمار کے مطابق رواں مالی سال 2018-19ء کے پہلے 8 ماہ کے دوران سیمنٹ کی برآمدات 4.65 ملین ٹن تک پہنچ گئیں جو گذشتہ مالی سال کی اسی مدت کے دوران 3.05 ملین ٹن تھیں۔ موجودہ حکومت نے اقتدار میں آنے کے بعد برآمدات کے فروغ کیلئے مؤثر حکمت عملی اپنائی جس کے مثبت نتائج سامنے آ رہے ہیں، حکومت کی طرف سے صنعتی شعبہ کو توانائی کی فراہمی سمیت دیگر سہولیات کی فراہمی سے نہ صرف پیداوار میں اضافہ ہوا ہے بلکہ برآمدات میں بتدریج تیزی آ رہی ہے۔ رواں مالی سال کے دوران سیمنٹ کی برآمدات میں تیزی سے ملکی معیشت پر اچھے اثرات مرتب ہونے اور برآمدات بڑھنے سے قیمتی زرمبادلہ بھی حاصل ہوا ہے۔

Reference: http://urdu.app.com.pk

چاول کی برآمدات سے سالانہ 2 ارب ڈالر زرمبادلہ کمایا جاتا ہے،رپورٹ

اسلام آباد ۔ 8 اپریل (اے پی پی) پاکستان میں زیر کاشت مجموعی رقبہ کے 10 فیصد حصہ پر چاول کاشت کیاجاتا ہے، چاول کا زیر کاشت رقبہ 2.89 ملین ہیکٹر کے قریب ہے۔ چاول کی برآمدات سے سالانہ 2 ارب ڈالر کا زرمبادلہ کمایا جاتا ہے۔ چاول کی برآمدات مجموعی قومی برآمدات میں تقریباً8 فیصد کی حصہ دار ہیں۔ اقتصادی جائزہ رپورٹ 2017-18ء کے مطابق چاول کی پیداوار میں 8 فیصد کا اضافہ ہوا اور برآمدات 6.84 ملین ٹن کے مقابلہ میں 7.44 ملین ٹن تک بڑھی ہیں۔ گزشتہ مالی سال کے دوران چاول کے زیر کاشت رقبہ اور پیداوار میں اضافہ سے چاول کی قومی برآمدات میں 28 فیصد کا اضافہ ریکارڈ کیاگیا ہے۔ اقتصادی تجزیہ کاروں نے کہا ہے کہ پاکستانی چاول اپنے ذائقہ اور معیار کی وجہ سے دنیا بھر میں پسند کیا جاتا ہے اس لئے ضرورت اس امر کی ہے کہ پاکستانی چاول کی اپنی برانڈز متعارف کرائی جائیں تاکہ چاول پیدا کرنے والی دیگر ممالک کا عالمی منڈیوں میں بہتر مقابلہ کیا جا سکے۔

Reference: http://urdu.app.com.pk

مالی سال 2018-19ءکے پہلے 8 ماہ کے دوران فارما سیوٹیکل پراڈکس کی برآمدات میں 27.89کا اضافہ

اسلام آباد ۔ 27 مارچ (اے پی پی) مالی سال 2018-19ءکے پہلے 8 ماہ کے دوران فارما سیوٹیکل پراڈکس کی ملکی برآمدات میں 27.89کا اضافہ ریکارڈ کیا گیا ہے۔ ادارہ برائے شماریات پاکستان کی رپورٹ کے مطابق مالی سال 2017-18ءمیں جولائی تا فروری کے دوران فارما سیوٹیکل پراڈکس کی برآمدات 7ہزار 358 میٹرک ٹن رہیں جن کی مجموعی مالیت 14 ہزار 347 ملین روپے تھی جبکہ مالی سال 2018-19ءکے اسی عرصہ کے دوران فارما سیوٹیکل پراڈکس کی ملکی برآمدات 7 ہزار 716میڑک ٹن تک بڑھ گئیں جن کی مجموعی مالیت 18ہزار 220 ملین تک پہنچ گئی۔اس طرح گزشتہ مالی سال 2017-18ءکے پہلے 8ماہ کے مقابلہ میں رواں مالی سال 2018-19ءکے اسی عرصہ کے دوران فارما سیوٹیکل پراڈکس کی برآمدات میں 3ہزار 973 ملین روپے یعنی 27.89کا اضافہ ریکارڈ کیا گیا ہے۔

Reference: http://urdu.app.com.pk

ملکی برآمدات میں 69.25 فیصد اضافہ

اسلام آباد ۔ 22 مارچ (اے پی پی) رواں مالی سال کے پہلے 8 ماہ کے دوران سیمنٹ کی ملکی برآمدات میں 69.25 فیصد کا اضافہ ریکارڈ کیا گیا۔ ادارہ برائے شماریات پاکستان کی رپورٹ کے مطابق گزشتہ مالی سال 2017-18ءمیں جولائی تا فروری کے دوران سیمنٹ کی ملکی برآمدات 29 لاکھ ہزار 322 میٹرک ٹن رہیں جن کی مجموعی مالیت 15ہزار 979 ملین روپے تھی جبکہ رواں مالی سال 2018-19ءکے اسی عرصہ کے دوران سیمنٹ کی ملکی برآمدات 48لاکھ 31ہزار 163میٹرک ٹن تک بڑھ گئیں جن کی مجموعی مالیت 27 ہزار 44 ملین روپے تک پہنچ گئی۔ اس طرح گزشتہ مالی سال 2017-18ءکے پہلے 8 ماہ کے مقابلہ میں رواں مالی سال کے اسی عرصہ کے دوران سیمنٹ کی ملکی برآمدات میں 11ہزار 65 ملین یعنی 69.25 فیصد کا واضح اضافہ ریکارڈ کیا گیا۔

Reference: http://urdu.app.com.pk

رواں مالی سال کے دوران بنگلہ دیش، بیلجیئم، فرانس سعودی عرب اور بھارت کو برآمدات میں اضافہ ہوا، سٹیٹ بینک

اسلام آباد ۔ 17 مارچ (اے پی پی) رواں مالی سال کے دوران مختلف ممالک کو پاکستان کی برآمدات میں اضافہ ریکارڈ کیا گیا ہے۔ سٹیٹ بینک آف پاکستان کے اعدادوشمارکے مطابق رواں مالی سال کے دوران جولائی سے جنوری تک پاکستان نے بنگلہ دیش کو برآمدات سے 451.183 ملین ڈالر کازرمبادلہ کمایا جو گزشتہ مالی سال کے اسی عرصہ کے مقابلے میں زیادہ ہے۔گزشتہ مالی سال کے اسی عرصہ میں پاکستان نے بنگلہ دیش کوبرآمدات سے 378.801 ملین ڈالر کازرمبادلہ حاصل کیا تھا۔ اعداد و شمارکے مطابق اس عرصہ میں بیلجیئم کو برآمدات سے پاکستان نے 356.712 ملین ڈالر کازرمبادلہ کمایا۔ اس عرصہ میں فرانس کو برآمدات سے پاکستان نے 268.500 ملین ڈالر کازرمبادلہ حاصل کیا۔ گزشتہ مالی سال کے اسی عرصہ میں فرانس کو برآمدات سے پاکستان نے 260.044 ملین ڈالرکا منافع حاصل کیا تھا۔مالی سال کے ابتدائی 7 مہینوں میں بھارت کو برآمدات سے پاکستان نے 249.840 ملین ڈالر کمائے ، گزشتہ مالی سال کے اسی عرصہ میں بھارت کو برآمدات سے پاکستان کو 240.073 ملین ڈالر حاصل ہوئے تھے۔ سعودی عرب کو اس عرصہ میں برآمدات سے ملک کو 179.851 ملین ڈالر حاصل ہوئے ، گزشتہ مالی سال کے اسی عرصہ میں سعودی عرب کو برآمدات سے پاکستان نے 191.662 ملین ڈالر کمائے تھے۔

Reference: http://urdu.app.com.pk