جنوبی افریقہ کو دوسرے ٹیسٹ میں بھی شکست دیکر سیریز میں 2-0 کی فیصلہ کن برتری حاصل کرینگے، ایشون

پونے ۔ 09 اکتوبر (اے پی پی) بھارتی کرکٹ ٹیم کے مایہ ناز سپنر بائولر روی چندرن ایشون نے کہا ہے کہ پروٹیز کو دوسرے ٹیسٹ میچ میں بھی شکست دیکر تین میچوں کی سیریز میں 2-0 کی فیصلہ کن برتری حاصل کرینگے۔ انہوں نے کہا کہ پروٹیز کے خلاف پہلے ٹیسٹ میں فتح کے بعد ٹیم کے حوصلے بلند ہیں اور وہ پہلے میچ کی طرح عمدہ کارکردگی کی بدولت ٹیم کی فتح میں اہم کردار ادا کریں گے۔ انہوں نے کہا کہ وہ مکمل طور پر فٹ اور بھرپور فارم میں ہیں اور اپنی ٹیم کو جنوبی افریقہ کے خلاف ٹیسٹ سیریز میں فتوحات دلانے کے لئے پرعزم ہیں۔ بھارت اور جنوبی افریقہ کی ٹیموں کے درمیان دوسرا ٹیسٹ میچ آج جمعرات سے پونے میں شروع ہوگا۔ اپنے ایک بیان میں ایشون نے کہا کہ انکی ٹیم مہمان ٹیم کو دوسرے ٹیسٹ میں بھی شکست دیکر سیریز میں برتری کو دگنا کریگی۔ انہوں نے کہا کہ ٹیم نے پروٹیز کے خلاف دوسرے ٹیسٹ کے لئے حکمت عملی تیار کر رکھی ہے جس کے تحت دوسرے میچ کیلئے مربوط حکمت عملی کے تحت جیت کیلئے ٹیم کو میدان میں اتاریں گے۔ انہوں نے کہا کہ وہ مکمل طور پر فٹ اور بھر پور فارم میں ہے اور مہمان ٹیم کے خلاف دوسرے میچ کیلئے میدان میں اترنے کو بے تاب ہیں۔

Reference: http://urdu.app.com.pk

انگلینڈ کا دورہ نیوزی لینڈ کےلئے ٹی 20 اور ٹیسٹ سکواڈ کا اعلان، ڈوم سبلی اور زیک کرالی پہلی بار ٹیسٹ ٹیم میں شامل

لندن ۔ 09 اکتوبر (اے پی پی) انگلینڈ نے دورہ نیوزی لینڈ کےلئے ٹی 20 اور ٹیسٹ سکواڈ کا اعلان کر دیا ہے، وکٹ کیپر بیٹسمین جونی بیرسٹو کو ٹیسٹ ٹیم سے ڈراپ کر دیا گیا ہے تاہم وہ ٹی 20 سکواڈ کا حصہ ہوں گے، ڈوم سبلی اور زیک کرالی کو پہلی بار ٹیسٹ ٹیم میں شامل کیا گیا ہے۔ انگلینڈ کی ٹیم آئندہ ماہ نیوزی لینڈ کا دورہ کرے گی جہاں وہ پانچ ٹی 20 اور دو ٹیسٹ میچز کی سیریز کھیلے گی۔ اعلان کردہ ٹی 20 سکواڈ میں آئن مورگن (کپتان)، جونی بیرسٹو، ٹام بینٹن، سیم بلنگز، پیٹ براﺅن، سیم کرن، ٹام کرن، جو ڈینلی، لیوس گریگوری، کرس جورڈن، ثاقب محمود، ڈیوڈ میلان، میٹ پارکنسن، عادل راشد اور جیمز ونس شامل ہیں۔ ٹیسٹ سکواڈ میں جو روٹ (کپتان)، جوفرا آرچر، سٹورٹ براڈ، روری برنز، جوز بٹلر، زیک کرالی، سام کرن، جو ڈینلی، جیک لیچ، ثاقب محمود، میتھیو پارکنسن، اولی پاپ، ڈومنک سبلی، بین سٹوکس اور کرس ووکس شامل ہیں۔

Reference: http://urdu.app.com.pk

بھارت اور جنوبی افریقہ کی کرکٹ ٹیموں کے درمیان دوسرا ٹیسٹ (آج) شروع ہوگا، میزبان ٹیم کو پروٹیز کے خلاف 1-0 کی برتری حاصل

پونے ۔ 09 اکتوبر (اے پی پی) بھارت اور جنوبی افریقہ کی کرکٹ ٹیموں کے درمیان تین ٹیسٹ میچز کی سیریز کا دوسرا میچ (آج) جمعرات سے 14 اکتوبر تک پونے میں کھیلا جائے گا۔ میزبان ٹیم کو پروٹیز کے خلاف تین میچوں کی سیریز میں 1-0 کی برتری حاصل ہے، بھارتی ٹیم نے جنوبی افریقہ کی ٹیم کو پہلے ٹیسٹ میچ میں 203 رنز سے شکست دی تھی۔ بھارتی ٹیم ویرات کوہلی کی قیادت میں میدان میں اترے گی جبکہ جنوبی افریقہ کی قیادت کے فرائض فاف ڈوپلیسی انجام دیں گے۔ اس سے قبل بھارت اور پروٹیز ٹیموں کے درمیان تین ٹی ٹونٹی میچوں کی سیریز 1-1 سے برابری پر ختم ہوگئی تھی۔ واضح رہے کہ دونوں ٹیموں کے درمیان دوسرا ٹیسٹ میچ کل جمعرات سے 14 اکتوبر تک پونے میں کھیلا جائے گا جبکہ تیسرا اور آخری ٹیسٹ میچ 19 سے 23 اکتوبر تک رانچی کے مقام پر کھیلا جائے گا۔ واضح رہے کہ ٹیسٹ سیریز ختم ہونے کے بعد جنوبی افریقن ٹیم واپس وطن لوٹ جائے گی اور آئندہ سال مارچ میں بھارت کے خلاف ون ڈے انٹرنیشنل سیریز کھیلے گی۔

Reference: http://urdu.app.com.pk

رگبی ورلڈ کپ ٹورنامنٹ 2019ء میں بدھ کو تین میچوں کا فیصلہ ہوگا

ٹوکیو ۔ 08 اکتوبر (اے پی پی) جاپان میں جاری نویں رگبی ورلڈ کپ 2019ء میں بدھ کو تین میچ کھیلے جائینگے۔ تفصیلات کے مطابق رگبی ورلڈ کپ کے سنسنی خیز مقابلوں کا سلسلہ جاری ہے، میگا ایونٹ میں آج بدھ کو پہلا میچ پول اے کی ٹیموں روس اور سکاٹ لینڈ کے درمیان کھیلا جائے گا، دوسرے میچ میں پول سی کی ٹیمیں امریکہ اور ارجنٹائن مدمقابل ہونگی جبکہ تیسرے میچ میں پول ڈی کی ٹیمیں فجی اور ویلز آمنے سامنے ہونگی۔ واضح رہے کہ عالمی کپ میں دنیا کی بہترین 20 ٹیمیں حصہ لے رہی ہیں جن میں آئرلینڈ، سکاٹ لینڈ، جاپان، روس، ساموا، نیوزی لینڈ، جنوبی افریقا، اٹلی، نمیبیا، کینیڈا، انگلینڈ، فرانس، ارجنٹائن، امریکا، ٹونگا، آسٹریلیا ویلز، جارجیا، فجی اور یوروگوئے شامل ہیں۔ نیوزی لینڈ کی ٹیم ٹائٹل کا دفاع کر رہی ہے، ٹورنامنٹ کا فائنل 2 نومبر کو کھیلا جائے گا۔

Reference: http://urdu.app.com.pk

رگبی ورلڈ کپ، جاپان، نیوزی لینڈ، انگلینڈ اور آسٹریلیاکی ٹیمیں اپنے پولز ٹیبل پر سرفہرست

ٹوکیو ۔ 07 اکتوبر (اے پی پی) جاپان، دفاعی چیمپئن نیوزی لینڈ، آسٹریلیا اور انگلینڈ کی ٹیمیں نویں رگبی ورلڈ کپ ٹورنامنٹ میں اپنے پولز ٹیبل پر سرفہرست ہیں۔ تفصیلات کے مطابق رگبی ورلڈ کپ کے سنسنی خیز مقابلوں کا سلسلہ جاپان میں اپنے عروج کو پہنچ چکا ہے۔ میگا ایونٹ میں اب تک کھیلے گئے میچز کے بعد جاپان، دفاعی چیمپئن نیوزی لینڈ، آسٹریلیا اور انگلینڈ کی ٹیمیں اپنے پولز میں ٹاپ پوزیشنز حاصل کر رکھی ہیں۔ جاپان کی ٹیم پول اے میں 14پوائنٹس کے ساتھ، دفاعی چیمپئن نیوزی لینڈ پول بی میں 14 پوائنٹس کے ساتھ، انگلینڈ کی ٹیم پول سی میں 15 پوائنٹس کے ساتھ جبکہ آسٹریلوی ٹیم پول ڈی میں 11 پوائنٹس کے ساتھ ٹاپ پوزیشن پر ہیں۔ واضح رہے کہ میگا ایونٹ کا ناک آئوٹ مرحلہ 19 اکتوبر سے شروع ہوگا اور دو فائنلسٹ ٹیموں کے درمیان میگا ایونٹ کا فائنل میچ 2 نومبر کو کھیلا جائے گا۔

Reference: http://urdu.app.com.pk