قومی ٹیم سائوتھ ایشین گرلز انڈر۔16 نیٹ بال چیمپئن شپ میں شرکت کرے گی، مدثر ارائیں

اسلام آباد۔ 11 اکتوبر (اے پی پی) قومی ٹیم سائوتھ ایشین گرلز انڈر۔16 نیٹ بال چیمپئن شپ میں شرکت کرے گی۔ پاکستان نیٹ بال فیڈریشن کے صدر مدثر ارائیں نے بتایاکہ یہ چیمپئن شپ رواں ماہ 19 سے 22 اکتوبر تک نیپال کے دالحکومت کٹھمنڈو میں کھیلی جائے گی اور چیمپئن شپ میں 6 ممالک کی ٹیموں کی کھلاڑی حصہ لے لیں گی۔ جن میں پاکستان، میزبان نیپال، سری لنکا، بھارت، مالدیپ اور بنگلہ دیش شامل ہیں۔ 18 اکتوبر کو چیمپئن شپ میں شرکت کرنے والی ٹیموں کی منیجرز میٹنگ ہوگی جس چیمپئن شپ کے قوانین اور ڈراز کا اعلان کیا جائے گا۔ انہوں نے کہا کہ قومی ٹیم کی کھلاڑیوں کا تربیتی کیمپ کراچی میں جاری ہے جس میں 15 کھلاڑی حصہ لے رہی ہیں اور ان کھلاڑیوں کو کوچز شازیہ یوسف اور انوار احمد انصاری تربیت دے رہی ہیں اور 12 رکنی قومی ٹیم کا اعلان 13 اکتوبر کو کیا جائے گا۔ ایونٹ میں شرکت کے لئے قومی ٹیم 15 اکتوبر کو نیپال روانہ ہوگی۔

Reference: http://urdu.app.com.pk

نیشنل گیمز، تھرو بال ایونٹ کیلئے پنجاب کی مرد اور خواتین کی مضبوط ٹیموں کا انتخاب کیا جائے گا، رانا سجاد اکبر

اسلام آباد ۔ 11 اکتوبر (اے پی پی) پنجاب تھروبال ایسوسی ایشن کے سیکرٹری جنرل رانا سجاد اکبر نے کہا ہے کہ نیشنل گیمز میں تھرو بال ایونٹ کیلئے پنجاب کی مرد اور خواتین کی مضبوط ٹیموں کا انتخاب کیا جائے گا۔ گذشتہ روز میڈیا سے گفتگو کرتے ہوئے انہوں نے کہا کہ پنجاب مرد اور خواتین کی ٹیموں کے چناؤ کیلئے تین روزہ ٹرائلز میں فیصل آباد میں منعقد ہوئے جس سے تربیتی کیمپ کیلئے میں 30، 30 کھلاڑیوں کا انتخاب کیا گیا ہے، ٹرائلز میں پنجاب بھر سے نو ڈویژن کے مرد اور خواتین کھلاڑیوں نے حصہ لیا جن میں فیصل آباد، لاہور، گوجرانوالہ، راولپنڈی، سرگودھا، ڈیرہ غازی خان، بہاولپور، ملتان اور ساہیوال شامل تھے۔ انہوں نے کہا کہ نیشنل گیمز کی تیاری کیلئے مرد اور خواتین کی ٹیموں کے کھلاڑیوں کا تربیتی کیمپ کریسنٹ سپورٹس کمپلیکس فیصل آباد میں جاری ہے اور ان کھلاڑیوں کو کوچز جدید اور اعلی تربیت دے رہے ہیں۔ انہوں نے کہا کہ پنجاب کی مرد اور خواتین ٹیموں کا اعلان میرٹ کی بنیاد پر آئندہ ہفتے کیا جائے گا۔ رانا سجاد نے کہا کہ نیشنل گیمز 26 اکتوبر سے یکم نومبر تک پشاور میں کھیلی جائیں گی جس میں مردوں اور خواتین کی چھ، چھ ٹیمیں حصہ لیں گی، مردوں کی ٹیموں میں پاکستان واپڈا، پاکستان پولیس، سندھ، پنجاب، بلوچستان اور خیبر پختونخوا جبکہ خواتین کی ٹیموں میں سندھ، پنجاب، بلوچستان، خیبر پختونخوا، گلگت بلتستان اور کلیگن کی ٹیمیں شامل ہیں۔

Reference: http://urdu.app.com.pk

کون بنے گا سی پی ایل چیمپئن؟ گیانا ایمزون واریئرز اور بارباڈوس ٹریڈنٹس ہفتہ کوفائنل میں آمنے سامنے ہونگی

ٹروبا ۔ 09 اکتوبر (اے پی پی) ناقابل شکست گیانا ایمزون واریئرز اور بارباڈوس ٹریڈنٹس کی ٹیمیںہفتہ کو کیربیئن پریمیئر لیگ کے فائنل میں ٹروبا کے مقام پر نبردآزما ہونگی۔ تفصیلات کے مطابق کیربیئن پریمیئر لیگاختتامی مراحلے میں داخل ہوچکی ہے۔ بارباڈوس ٹریڈنٹس کو لیگ کی ناقابل شکست ٹیم گیانا ایمزون واریئرز کا فائنل میں چیلنج درپش ہوگا جوہفتہ کو ٹروبا کے مقام پر کھیلا جائے گا۔ اس سے قبل گیانا ایمزون واریئرز نے کولیفائر ون میں بارباڈوس کو شکست دیکر فائنل کھیلنے کا اعزاز حاصل کیا تھا۔ گیانا ایمزون کی ٹیم لیگ میں ناقابل شکست ہے اور کوئی میچ نہیں ہاری، اپنے دس میچز جیتنے کے بعد کوالیفائر ون میچ بھی اپنے نام کیا۔ ادھر بارباڈوس ٹریڈنٹس نے ٹرنباگو نائٹ رائیڈرز کی ٹیم کو کوالیفائر ٹو میں شکست دیکر فائنل کھیلنے کا اعزاز حاصل کیا۔ گیانا ایمزون واریئرز کی ٹیم شعیب ملک کی قیادت میں میدان میں اترے گی جبکہ بارباڈوس ٹریڈنٹس کی ٹیم کی قیادت جیسن ہولڈر کرینگے۔ ناقابل شکست گیانا ایمزون واریئرز کو فائنل کے لئے فیورٹ قرار دیا جا رہا ہے، دونوں فائنلسٹ ٹیموں کے کپتانوں نے میچ میں کامیابی کے لئے بیانات دیئے ہیں اور توقع کی جارہی ہے کہ دونوں ٹیموں کے درمیان فائنل میچ کانٹے دار ہوگا۔

Reference: http://urdu.app.com.pk

کیریبین پریمیئر لیگ، بارباڈوس ٹریڈنٹس سی پی ایل کے فائنل میں پہنچ گئی

ٹروبا ۔ 11 اکتوبر (اے پی پی) بارباڈوس ٹریڈنٹس کی ٹیم کیریبین پریمیئر ٹی ٹونٹی کرکٹ لیگ کے فائنل میں پہنچ گئی، ٹرنباگو نائٹ رائیڈرز کی ٹیم کوالیفائر ٹو میں 12 رنز سے شکست کا سامنا، بارباڈوس ٹریڈنٹس اور گیانا امیزون واریئرز کیربیئن پریمیئر لیگ کے فائنل میں (آج) ہفتہ کو آمنے سامنے ہونگی، ٹرنباگو نائٹ رائیڈرز161 رنز کا ہدف حاصل کرنے میں ناکام رہی، سیکیوگ پراسانا کے 51 رنز رائیگاں، ایشلے نرسی کو آل رائونڈ کارکردگی پر میچ کا بہترین کھلاڑی قرار دیا گیا۔ جمعہ کو ٹروبا میں کھیلے گئے سی پی ایل کے کوالیفائر ٹو میچ میں ٹرنباگو نائٹ رائیڈرز کے کپتان کیرون پولارڈ نے ٹاس جیت کر پہلے فیلڈنگ کا فیصلہ کیا، بارباڈوس ٹریڈنٹس کی ٹیم نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 160 رنز بنا کر ٹرنباگو نائٹ رائیڈرز کو میچ میں کامیابی کے لئے 161 رنز کا ہدف دیا۔ جانسن چارلس 35، ریمون ریفر اور ایشلے نرسی نے بالترتیب ناقابل شکست 24, 24 رنز بنائے، شائی ہوپ نے 23 رنز بنائے۔ ٹرنباگو نائٹ رائیڈرز کے علی خان، کرس جارڈن اور خارے پیری نے دو، دو کھلاڑیوں کو آئوٹ کیا۔ جواب میں ٹرنباگو نائٹ رائیڈرز کی ٹیم مطلوبہ ہدف حاصل کرنے میں ناکام رہی اور پوری ٹیم پوری ٹیم 19.3 اوورز میں 148 رنز بناسکی، سیکیوگ پراسانا کے 51 رنز رائیگاں گئے، کپتان کیرن پولارڈ 23 رنز بناکر رن آئوٹ ہوگئے۔ بارباڈوس ٹریڈنٹس کے جرنی، والش، نرسی اور ریفر نے دو، دو کھلاڑیوں کو آئوٹ کیا۔ نرسی میچ کے بہترین کھلاڑی قرار پائے۔

Reference: http://urdu.app.com.pk

تیسری جوبلی انشورنس رینکنگ سنوکر چیمپئن شپ جمعہ سے شروع ہوگی

اسلام آباد ۔ 10 اکتوبر (اے پی پی) پاکستان سنوکر فیڈریشن کے زیراہتمام تیسری جوبلی انشورنس رینکنگ سنوکر چیمپئن شپ جمعہ سے کراچی جمخانہ میں شروع ہوگی۔ پاکستان سنوکر فیڈریشن کے ترجمان نوید کپاڈیہ نے بتایاکہ چیمپئن شپ کے حوالے سے تیاریاں زور و شور سے جاری ہیں اور چیمپئن شپ میں ملک بھر سے کیوئٹس شرکت کرینگے۔ انہوں نے کہا کہ چیمپئن شپ 18 اکتوبر تک جاری رہے گی اور چیمپئن شپ کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔

Reference: http://urdu.app.com.pk