قومی ویمن کرکٹ ٹیم کا تربیتی کیمپ اتوار سے شروع ہوگا

اسلام آباد ۔ 12 اکتوبر (اے پی پی) بنگلہ دیش سے سیریز کیلئے قومی خواتین کرکٹ ٹیم کا تربیتی کیمپ اتوار سے کنٹری کلب، مرید کے میں شروع ہوگا۔ بنگلہ دیش کے خلاف سیریز قومی ٹیم کی اپنے ہوم گراؤنڈ میں رواں سال کے دوران دوسری سیریز ہوگی۔ اس سے قبل پاکستان اور ویسٹ انڈیز کی خواتین کرکٹ ٹیموں کے درمیان سیریز کراچی میں کھیلی جا چکی ہے۔ پاکستان اور بنگلہ دیش کے درمیان تین ٹی 20 اور دو ون ڈے میچز پر مشتمل سیریز کا آغاز 26 اکتوبر سے ہوگا، سیریز کے تمام میچز قذافی سٹیڈیم، لاہور میں کھیلے جائیں گے۔ 23 اکتوبر تک جاری رہنے والے تربیتی کیمپ میں عالیہ ریاض، انعم امین، عائشہ ظفر، ناہیدہ خان، بسمعہ معروف، ڈیانا بیگ، فریحہ محمود، ارم جاوید، جویریہ خان، کائنات امتیاز، عمیمہ سہیل، صباء نذیر، سعدیہ اقبال، ثناء میر، سدرہ امین اور سدرہ نواز شامل ہیں۔

Reference: http://urdu.app.com.pk

نیوزی لینڈ اور بنگلہ دیش انڈر۔19 کے درمیان آخری ون ڈے (آج) کھیلا جائے گا

ویلنگٹن ۔ 12اکتوبر (اے پی پی) نیوزی لینڈ اور بنگلہ دیش کی انڈر۔19 کرکٹ ٹیموں کے درمیان پانچواں اور آخری ون ڈے میچ (آج) اتوار کو کھیلا جائے گا۔ بنگلہ دیش کو یوتھ سیریز میں 3-1 کی فیصلہ کن برتری حاصل ہے، بنگلہ دیش انڈر 19 نے پہلے دونوں میچز میں چھ وکٹ جبکہ تیسے میچ میں آٹھ وکٹ سے کامیابی حاصل کرکے سیریز اپنے نام کی، نیوزی لینڈ نے چوتھے ون ڈے میچ میں بنگلہ دیش کو 4 وکٹوں سے ہرایا۔

Reference: http://urdu.app.com.pk

قومی ٹی 20 کپ اتوار سے شروع ہوگا

اسلام آباد ۔ 11 اکتوبر (اے پی پی) پاکستان کرکٹ بورڈ (پی سی بی) کے زیر اہتمام قومی ٹی 20 کپ اتوار سے اقبال سٹیڈیم، فیصل آباد میں شروع ہوگا۔ ٹورنامنٹ میں چھ کرکٹ ایسوسی ایشنز کی ٹیمیں حصہ لیں گی جن میں نادرن، بلوچستان، خیبرپختونخوا، سندھ، سدرن پنجاب اور سینٹرل پنجاب شامل ہیں۔ ایونٹ سنگل لیگ کی بنیاد پر کھیلا جائے گا اور چار بہترین ٹیموں کے درمیان سیمی فائنل میچز 23 اکتوبر کو ہوں گے، ٹورنامنٹ کا فائنل 24 اکتوبر کو کھیلا جائے گا۔

Reference: http://urdu.app.com.pk

سید زاہد گیلانی میموریل چیس ٹورنامنٹ اتوار کوکھیلا جائے گا

اسلام آباد ۔ 11 اکتوبر (اے پی پی) پاکستان چیس فیڈریشن کے زیراہتمام اور پنجاب چیس ایسوسی ایشن کے تعاون سے سید زاہد گیلانی میموریل چیس ٹورنامنٹ اتوار کو لاہور میں کھیلا جائے گا۔ چیف آرگنائزر محمد شفیق نے بتایاکہ ٹورنامنٹ کی تیاریاں زور و شور پر ہیں اور ٹورنامنٹ میں ملک بھر سے کھلاڑی حصہ لیں گے۔ ٹورنامنٹ میں شرکت کی خواہش رکھنے والے کھلاڑیہفتہ تک اپنے اپنے ناموں کا اندراج کروا سکتے ہیں۔ ٹورنامنٹ میں اول پوزیشن حاصل کرنے والے کھلاڑی کیلئے دس ہزار روپے، دوئم آنے والے کو سات ہزار روپے، تیسری پوزیشن حاصل کرنے کھلاڑی کو پانچ ہزار روپے انعام ملیں گے۔ چوتھی پوزیشن کیلئے تین ہزار روپے، پانچویں اور چھٹی پوزیشن کیلئے دو، دو ہزار روپے جبکہ ساتویں سے لے کر بارہویں پوزیشن تک کامیابی حاصل کرنے والے کھلاڑیوں کو پندرہ، پندرہ سو روپے بطور انعام دیئے جائیں گے۔ پاکستان چیس فیڈریشن کے نائب صدر امین ملک نے بتایاکہ پاکستان چیس فیڈریشن کے زیراہتمام ہر ماہ چیس ٹورنامنٹ باقاعدگی سے منعقد ہو رہا ہے جس سے نوجوان نسل کو سیکھنے کا موقع مل رہا ہے

Reference: http://urdu.app.com.pk

رگبی ورلڈ کپ، سمندری طوفان کے خطرے کے پیش نظر پول بی اور سی کے میچز منسوخ

ٹوکیو ۔ 11 اکتوبر (اے پی پی) جاپان میں جاری نویں رگبی ورلڈ کپ 2019ء میں ہفتہ کو تین میچوں کا فیصلہ ہونا تھا تاہم سمندری طوفان ہیگی بس کے خطرے کے پیش نظر میگا ایونٹ کے پول بی اور پول سی کے میچز منسوخ کر دیئے گئے ہیں۔ رگبی ورلڈ کپ کے سنسنی خیز مقابلوں کا سلسلہ جاری ہے، میگا ایونٹ میں ہفتہ کو پول بی میں دفاعی چیمپئن نیوزی لینڈ کا مقابلہ اٹلی سے ہونا تھا اور پول سی کا میچ انگلینڈ اور فرانس کی ٹیموں کے درمیان کھیلا جانا تھا جبکہ میگا ایونٹ میں ہفتہ کو شیڈول تیسرے میچ کو برقرار رکھا گیا ہے جس میں پول اے کی ٹیمیں آئرلینڈ اور ساموا آمنے سامنے ہوںگی۔ واضح رہے کہ دفاعی چیمپئن نیوزی لینڈ، انگلینڈ، فرانس اور جنوبی افریقہ کی ٹیمیں میگا ایونٹ کے کوارٹر فائنل مرحلے کے لئے کوالیفائی کر چکی ہیں۔ عالمی کپ میں دنیا کی بہترین 20 ٹیمیں حصہ لے رہی ہیں جن میں آئرلینڈ، سکاٹ لینڈ، جاپان، روس، ساموا، نیوزی لینڈ، جنوبی افریقا، اٹلی، نمیبیا، کینیڈا، انگلینڈ، فرانس، ارجنٹائن، امریکا، ٹونگا، آسٹریلیا، ویلز، جارجیا، فجی اور یوروگوئے شامل ہیں۔ نیوزی لینڈ کی ٹیم ٹائٹل کا دفاع کر رہی ہے۔ میگا ایونٹ کا کوارٹر فائنل مرحلہ 19 اکتوبر کو شروع ہوگا، پہلا سیمی فائنل میچ 26 اکتوبر جبکہ دوسرا سیمی فائنل میچ 27 اکتوبر کو کھیلا جائے گا۔ ٹورنامنٹ کا فائنل 2 نومبر کو کھیلا جائے گا۔

Reference: http://urdu.app.com.pk