کوڈ آف کنڈیکٹ کی خلاف ورزی، افغانستان نے محمد شہزاد پر ایک سال تک تمام طرز کی کرکٹ کھیلنے پر پابندی عائد کر دی

کابل ۔ 18 اگست (اے پی پی) افغانستان کرکٹ بورڈ نے کوڈ آف کنڈیکٹ کی خلاف ورزی کرنے پر اوپننگ بیٹسمین محمد شہزاد پر ایک برس تک تمام طرز کی کرکٹ کھیلنے پر پابندی عائد کر دی۔ افغانستان کرکٹ بورڈ کی طرف سے جاری کردہ بیان کے مطابق شہزاد نے اے سی بی کے ڈسپلنری اور ریگولیشنز رولز کی خلاف ورزی کرنے کے ساتھ ساتھ بورڈ کے کوڈ آف کنڈیکٹ کی بھی دھجیاں اڑائیں ہیں، شہزاد نے کئی مرتبہ بورڈ سے اجازت لئے بغیر بیرون ممالک سفر کئے جو کہ اے سی بی کی کھلاڑیوں کیلئے بنائی گئی پالیسیوں کی کھلم کھلا خلاف ورزی ہے۔

Reference: http://urdu.app.com.pk

قومی ٹیم ورلڈ انڈر 16 سنوکر چیمپئن شپ میں شرکت کیلئے روس روانہ ہو گئی

اسلام آباد ۔ 18 اگست (اے پی پی) قومی ٹیم آئی بی ایس ایف ورلڈ انڈر 16 سنوکر چیمپئن شپ میں شرکت کیلئے اتوار کو روس روانہ ہو گئی۔ ایونٹ کا آغاز (آج) پیر سے ہو گا جس میں محمد عمر خان اور حمزہ الیاس پاکستان کی نمائندگی کریں گے۔ اتوار کو پاکستان بلیئرڈ اینڈ سنوکر ایسوسی ایشن (پی بی ایس اے) کے میڈیا کوو آرڈینیٹر نوید کپاڈیا نے اے پی پی سے بات چیت کرتے ہوئے بتایا کہ قومی ٹیم ورلڈ انڈر 16 سنوکر چیمپئن شپ میں شرکت کیلئے روس روانہ ہو گئی ہے، حمزہ الیاس اور محمد عمر خان میگا چیمپئن شپ میں ملک کی نمائندگی کریں گے۔ انہوں نے کہا کہ دونوں کھلاڑی باصلاحیت ہیں امید ہے کہ وہ ایونٹ میں شاندار کارکردگی کا مظاہرہ کر کے بہترین نتائج کے ساتھ واپس وطن لوٹیں گے۔ انہوں نے بتایا کہ 24 اگست تک جاری رہنے والی چیمپئن شپ میں پاکستان سمیت 42 ممالک کے کیوئسٹس ٹائٹل کے حصول کیلئے قسمت آزمائی کریں گے۔

Reference: http://urdu.app.com.pk

ورلڈ ٹیسٹ چیمپئن شپ، کرونارتنے کی شاندار سنچری، سری لنکا نے نیوزی لینڈ کو پہلے ٹیسٹ میچ میں 6 وکٹوں سے ہرا کر 60 پوائنٹس حاصل کر لئے

گال۔ 18 اگست (اے پی پی)آئی سی سی ورلڈ ٹیسٹ چیمپئن شپ میں دیمتھ کرونارتنے کی شاندار سنچری کی بدولت سری لنکا نے نیوزی لینڈ کو پہلے ٹیسٹ میچ میں 6 وکٹوں سے شکست دے کر 60 پوائنٹس حاصل کر لئے، فاتح ٹیم نے 268 رنز کا ہدف میچ کے آخری روز اپنی دوسری اننگز میں 4 وکٹوں کے نقصان پر حاصل کیا، کپتان دیمتھ کرونارتنے اور لاہیرو تھریمانے نے شاندار بلے بازی کا مظاہرہ کرتے ہوئے ٹیم کو 161 رنز کا جاندار آغاز فراہم کر کے اس کی جیت کی بنیاد رکھی، تھریمانے 64 رنز بنا کر آﺅٹ ہو گئے لیکن کرونارتنے نے ڈٹ کر کیویز باﺅلرز کا مقابلہ کیا اور 122 رنز کی دلکش اننگز کھیل کر ٹیم کو فتح دلوائی، انہیں عمدہ بلے بازی کا مظاہرہ کرنے پر میچ کے بہترین کھلاڑی کا ایوارڈ دیا گیا۔

Reference: http://urdu.app.com.pk

گال ٹیسٹ پر سری لنکا کی گرفت مضبوط، نیوزی لینڈ کا سری لنکا کو فتح کیلئے 268 رنز کا ہدف،

گال ۔ 17 اگست (اے پی پی) آئی سی سی ورلڈ ٹیسٹ چیمپئن شپ کے سلسلے میں سری لنکا اور نیوزی لینڈ کی کرکٹ ٹیموں کے درمیان پہلا ٹیسٹ میچ فیصلہ کن مرحلے میں داخل ہو گیا ہے اور میزبان ٹیم کی میچ پر گرفت مضبوط ہے، نیوزی لینڈ کی ٹیم دوسری اننگز میں 285 رنز بنا کر آﺅٹ ہو گئی اور اس نے آئی لینڈرز کو فتح کیلئے مجموعی طور پر 268 رنز کا ہدف دیا، بی جے واٹلنگ 77 رنز بنا کر نمایاں رہے، سومر ویلی 40 رنز بنا کر ناٹ آﺅٹ رہے، ایمبل ڈینیا نے 4 کھلاڑیوں کو آﺅٹ کیا۔ جواب میں سری لنکن ٹیم نے چوتھے روز کھیل ختم ہونے تک اپنی دوسری اننگز میں بغیر کسی وکٹ کے نقصان پر 133 رنز بنا لئے تھے، کپتان دیمتھ کرونارتنے 71 اور لاہیرو تھریمانے 57 رنز کے ساتھ وکٹ پر موجود ہیں، میزبان ٹیم کو فتح کیلئے مزید 135 رنز اور کیویز کو 10 وکٹوں کی ضرورت ہے۔

Reference: http://urdu.app.com.pk

پاکستان میں 10 برس بعد ٹیسٹ کرکٹ کی واپسی کا امکان

کولمبو ۔ 17 اگست (اے پی پی) پاکستان میں 10 برس بعد ٹیسٹ کرکٹ کی واپسی کے امکانات پیدا ہو گئے ہیں۔ سری لنکا نے سیکیورٹی وفد کی طرف سے مثبت رپورٹ ملنے کے بعد ٹیم کو دورہ پاکستان بھیجنے پر غور شروع کر دیا ہے اور جلد ہی اس بات کا حتمی اعلان متوقع ہے۔ اگر ساری چیزین پلان کے مطابق ہوئیں تو پاکستان 10 برس بعد اپنی سرزمین پر کسی ٹیم کے خلاف ٹیسٹ میچ کی میزبانی کرے گا۔ مارچ 2009ءمیں سری لنکن ٹیم پر حملے کے بعد پاکستان میں انٹرنیشنل کرکٹ ختم ہو گئی ہے اور گرین شرٹس کو ہوم سیریز بھی متبادل مقام پر کھیلنا پڑ رہی ہیں۔ پاکستان کرکٹ بورڈ (پی سی بی) ملک میں انٹرنیشنل کرکٹ کی بحالی کیلئے سرتوڑ کوشش کر رہا ہے اور اسی سلسلے میں پی سی بی نے سری لنکن ٹیم کو دورہ پاکستان کی دعوت دی ہے جس پر سری لنکا نے اپنا سیکیورٹی وفد پاکستان بھیجا تھا۔ سری لنکا سیکیورٹی وفد نے لاہور اور کراچی کا دورہ کیا اور انتظامات کا جائزہ لینے کے بعد اپنے بورڈ کو رپورٹ پیش کر دی ہے۔

Reference: http://urdu.app.com.pk